Супер оғир вазндаги россиялик боксчи Александр Поветкиннинг допинг текширувида унинг қони таркибида жуда кам миқдорда мельдоний моддаси қолдиқлари борлиги аниқланди. Ушбу моддани спортчи охирги марта 2015 йилнинг сентябрида истеъмол қилгани маълум бўлди. Бу ҳақда боксчининг манфаатларини ифодаловчи «Мир бокса» промоутерлик компанияси раҳбари Андрей Рябинский баёнот берди.
«Қонда мельдонийнинг кам миқдордаги қолдиқ излари топилди. У мазкур моддани ўтган йил сентябрида истеъмол қилганди. 1 январдан сўнг эса истеъмол қилмади. Вазият ғалати. Допинг учун проба апрелда олинганди. Биз WBC (Халқаро бокс кенгаши) билан алоқадамиз», — унинг сўзларини келтиради «ТАСС».
Рябинскийнинг таъкидлашича, Поветкиннинг Деонтей Уайлдер билан 21 майга белгиланган учрашуви бўладими, бўлмайдими — буни WBC ҳал қилади.
Изоҳ (0)