Toshkentdagi “Istiqlol” san’at saroyida 13—15-may kunlari “Mening Toshkentim” deb nomlangan myuzikl namoyishi bo‘lib o‘tadi. Jonli ijroda bo‘ladigan myuzikl aynan qaysi jihatlari bilan tomoshabinni hayratga solishi mumkin? Rollarni kimlar ijro etadi? Shu kabi savollarga javob topish maqsadida jurnalist Feruz Muhammad dasturning sahnalashtiruvchi rejissori Husan Solihov bilan suhbatlashdi.
— Myuzikl haqida aniqroq ma’lumot bersangiz?— Soddaroq tushuntiradigan bo‘lsak, myuzikl — teatrlashtirilgan konsert dasturi. Myuzikldan ko‘zlangan maqsadimiz — oddiy konsert dasturidan kattaroq, mazmunli, ma’naviy jihatdan yuqori darajada sahna asarini taqdim etish. “Mening Toshkentim” deb nomlangan myuziklda ham aynan shu jihatlarga e’tibor qaratganmiz.
— “Istiqlol”dagi konsertlarga, agar jonli bo‘lsa kamida ikki oy, fonogrammada bo‘lsa bir oy vaqt mobaynida tayyorgarlik ko‘riladi. Myuziklni tayyorlash uchun qancha vaqt ketdi?— Mazkur myuziklga tayyorgarlik ko‘rishni fevralda boshlaganmiz. Avval ssenariyni yozib, qo‘shiqlar, aktyor-aktrisalar, xonandalar tanlaganmiz. Aprelning boshida repititsiyalarni boshlaganmiz. Fevralda qo‘yilgan “Qor malikasi” nomli birinchi myuziklimizni tugatganimizdan so‘ng, orada 15 kuncha dam olib, so‘ng harakatga kirishgan edik.
— Myuzikl faqat rus tilida bo‘ladimi?— Toshkent aholisi ko‘p yillardan beri ham o‘zbek, ham rus tilida so‘zlashadi, odamlar so‘nggi yillarda ingliz tilini ham mukammal o‘rganmoqda. Myuzikl Toshkentning mana shu ruhini saqlagan holda, ham rus, ham o‘zbek, ham ingliz tilida bo‘lib o‘tadi.
— Aktyorlar jamoasi nima asosida shakllantirilgan?— Ssenariy tayyor bo‘lganidan so‘ng, aktyorlar jamoasini shakllantirishni boshladik. Myuzikl jonli ijroda bo‘lgani bois, ham vokal nuqtai nazardan, ham aktyorlik mahorati kuchli bo‘lgan ijodkorlarni yig‘ishga harakat qildik. Myuziklda musiqa fonogramma bo‘lsa ham, ijrochilar ovozi 100 foiz jonli bo‘ladi. Aktyorlardan Fotima Rejametova, Muhammadiso Abdulxayirov, Adiz Rajabov, Asal Shodiyeva, xonandalardan “VIA Sharq” guruhi, Jasur Mirsoatov va boshqalarni tarkibga jamlaganmiz. Mazkur ijodkorlar ham jonli kuylab, ham o‘z aktyorlik mahoratini namoyon eta oladi. Bosh rol ijrochilaridan tashqari, 20 dan ziyod yordamchi aktyorlar jamoasi ham sahnada rol ijro etadi, raqsga tushib, kuylaydi. Shu vaqtgacha tomoshabinlar Muhammadiso Abdulxayirov yoki Adiz Rajabovni sahnada qo‘shiq kuylaganini yoki “VIA Sharq” guruhi a’zolarining aktyorlik mahoratini ko‘rmagan.
— “Qor malikasi” myuzikli tomoshabinlar tomonidan qanday kutib olindi?— Aynan “Qor malikasi”ning muvaffaqiyati, tomoshabinlar tomonidan juda yaxshi kutib olingani sababli ham yana bir shunday dastur tashkillashtirish uchun o‘zimizda kuch topdik. Tomoshabinlar bu safar ham kutilmagan chiqishlardan zavqlanib, madaniy hordiq olib ketishadi, degan umiddamiz.
Izoh (0)