«Бавария» кетма-кет тўртинчи бор Германия чемпионлигини қўлга киритди

Футбол бўйича Германия Бундеслигасида мавсум якунига 1 та тур қолганида Мюнхеннинг «Бавария» клуби кетма-кет тўртинчи чемпионликни нишонлади.

«Бавария» 33-турни сафарда «Ингольштадт» клубига қарши ўтказиб, Роберт Левандовскининг дубли эвазига зафар қучди ва ўз тарихида 26-бор Бундеслига олтин медалларига эга чиқди.

Қайд этиш керак, бир тур аввал «Бавария» ўз майдонида очко йўқотиб, Allianz Arena’да чемпионликни тантана қилиш имкониятини қўлдан бой берганди.

Келаси мавсумдан эътиборан Англиянинг «Манчестер Сити» клубини бошқарадиган Хосеп Гвардиола бошқарувида «Бавария» кетма-кет уч бор Германия чемпионлигига эришди. Чемпионлар Лигасининг 2015/16 йилги мавсуми ярим финалида «Атлетико» довонидан ўта олмаган «Бавария», қаторасига уч мавсум финал остонасида Испания клубларидан енгилган жамоага айланди.

• Хосеп Гвардиола: «Бавария»да имкон қадар барча ишни қилдим, одамлар эса истаганини гапираверсин

Маълумот учун, Бундеслига сўнгги туридаги натижалар қандай бўлишига қарамай, «Боруссия Дортмунд» кумуш, «Байер» эса бронза медаллари билан тақдирланади.

Бундеслиганинг сўнгги тури Европа Чемпионлар Лигасига йўлланма берувчи сўнгги жамоа номига ойдинлик киритиб беради. Бунинг учун 4 та жамоа кураш олиб бормоқда. Улар мос равишда қуйида келтирилганича очко жамғарган: «Боруссия Мёнхенгладбах» 52, «Майнц» 49, «Герта» 49, «Шальке» 49.

Германия Бундеслигаси 33-тур беллашувлари 7 май, шанба

«Айнтрахт» — «Боруссия Дортмунд» 1:0

Гол: Штефан Айгнер, 14 (1:0).

«Боруссия Мёнхенгладбах» — «Байер» 2:1

Голлар: Черлес Арангис, 20 (0:1). Андре Хан, 43 (1:1). Андре Хан, 79 (2:1).

«Гамбург» — «Вольфсбург» 0:1

Гол: Луис Густаво, 73 (0:1).

«Ганновер» — «Хоффенхайм» 1:0

Гол: Хироси Кийотаке, 28 (1:0).

«Герта» — «Дармштадт» 1:2

Голлар: Владимир Дарида, 14 (1:0). Жером Гондорф, 24 (1:1). Сандро Вагнер, 83, (1:2).

«Ингольштадт» — «Бавария» 1:2

Голлар: Роберт Левандовски, 15-пен (0:1). Роберт Левандовски, 32 (0:2). Моритц Хартманн, 42-пен (1:2).

«Кёльн» — «Вердер» 0:0

«Шальке» — «Аугсбург» 1:1

Голлар: Клас-Ян Хунтелар, 82 (1:0). Даниэль Байер, 89 (1:1).

«Штутгарт» — «Майнц» 1:3

Голлар: Кристиан Гентнер, 6 (1:0). Юнус Малли, 37 (1:1). Жон Кордоба. 53 (1:2). Карим Онисиво, 77 (1:3).