Facebook’даги «Водители Ташкента» гуруҳида қоидабузар автобусларнинг суратлари эълон қилинди. Суратлар қачон, Тошкентнинг қаерида олинганига аниқлик киритилмаган.
Фойдаланувчилар томонидан эълон қилинган биринчи суратда йўналиш рақами 93, давлат рақам белгиси 01 789 XCA бўлган Mercedes-Benz Conecto Low Floor автобуси икки қатор сидирға чизиқни босиб, йўлнинг қарама-қарши қатнов қисмига чиққанини кўриш мумкин.
Иккинчи суратда эса йўналиш рақами 91, давлат рақам белгиси 01 606 TCA бўлган Mercedes-Benz Conecto Low Floor автобуси ҳам икки қатор сидирға чизиқни босиб, қарама-қарши қатнов қисмига чиқиб турганини тасвирланган.
«Водители Ташкента» аъзолари автобус ҳайдовчиларининг кўплаб йўловчиларнинг ҳаётини хавф остига қўйиб, Йўл ҳаракати қоидаларини қўпол равишда бузишини танқид остига олган. Фойдаланувчиларнинг бирининг таъкидлашича, «автобус ҳайдовчилари — энг безбет қоидабузарлардир».
Маълумот учун, Маъмурий жавобгарлик тўғрисидаги кодекснинг 128-5-моддаси 2-қисмига кўра, транспорт воситалари ҳайдовчиларининг йўлнинг қарама-қарши ҳаракатланиш учун мўлжалланган томонига ёки бўлагига йўл ҳаракати қоидаларини бузган ҳолда чиқиши энг кам иш ҳақининг 10 баравари (26 апрель ҳолатига кўра — 1 302 400 сўм) миқдорида жаримага сабаб бўлади.
Изоҳ (0)