Хитойнинг IAT Design компанияси Пекин автосалонига олти метрли Karlmann King йўлтанламасини олиб келди. Янгилик атиги 10 дона тайёрланган, ҳар бирининг нархи 12 миллион юань (1,9 миллион доллар) туради. Бу ҳақда Motor хабар бермоқда.
Машина АҚШда энг ҳашаматли версияси 71,3 минг доллар турадиган Ford F-450 Super Duty оғир пикапи асосида яратилган, фақат Karlmann андоза олинган автомобилга қараганда 26 маротаба қимматлашган, холос. Унинг 6,8 литрли ўн цилиндрли Ford Triton бензинли мотори билан жиҳозлангани тахмин қилинмоқда.
Йўлтанламаснинг жанговар қиличга ўхшаш рамзи тоза тилладан тайёрланган, интерьери эса қора тери, алькантара, шунингдек, тилла суви юритилган ёғоч қўшимчалар билан бойитилган. Анжомлар қаторига планшетлар учун таглик, музлатгич, шампань виноси учун қадаҳлар ва чой ичишга мўлжалланган тўплам ҳам киритилган. 20 та динамикали кучли стереотизим, уч ўлчамли экран ва стробоскоп ҳам авто эгалари ихтиёрида бўлади.
Изоҳ (0)