Бунёдкор кўчасининг «Олмазор» метро бекати яқинидан ўтган қисмида йўлдан ўта олмаётган кекса отахонга ёрдам кўрсатган ҳайдовчи Facebook’даги «Водители Ташкента» гуруҳида олқишланди.
Фойдаланувчи томонидан эълон қилинган видеорегистратор ёзувида автомобиль Бунёдкор кўчаси бўйлаб ҳаракатланаётгани, «Олмазор» метро бекатига яқин жойдаги светофор ишламай қолгани ва автомобиллари йўл бермаётгани сабаб, кекса отахон йўлдан ўта олмаётганини кўриш мумкин.
Видео муаллифи светофор ишламай қолган пиёдалар ўтиш жойи яқинида тўхтаб, машинадан тушган ва отахонни йўлдан ўтказиб қўйган, бу вақтда бошқа томондан ҳам бир йигит югуриб келиб, отахонга ёрдам беришга ошиққан.
Отахон икки кишининг ёрдами билан йўлдан ўтишни бошлаганида ҳам, қўшни бўлаклардаги автомобиллар ҳаракатни давом эттирган. Умуман, видео муаллифи тўхтаб, то отахон йўлдан ўтиб бўлгунича 12 та автомобиль, хусусан, инкассация хизматининг Captiva’си пиёдага йўл бермаган.
«Водители Ташкента» гуруҳи аъзолари видео муаллифининг отахонга кўрсатган ёрдамини олқишлаган, бундай ибратли ишларни ҳар ким ҳар куни қилиши кераклиги ҳақида фикрлар билдириб, видео муаллифига миннатдорчилик билдирган. Айни вақтда, бу видеохабар фақат мақтаниш мақсадида қўйилган, деб фикр билдирганлар ҳам бор.
Маълумот учун, Йўл ҳаракати қоидаларига кўра, светофорлари ишламаётган чорраҳа — тартибга солинмаган чорраҳа ҳисобланади. Қоидаларнинг 110-бандига мувофиқ, тартибга солинмаган пиёдалар ўтиш жойи олдида транспорт воситаси ҳаракатини секинлаштирса ёки тўхтаса, қўшни бўлакларда ҳаракатланаётган бошқа ҳайдовчилар бу транспорт воситаси олдида пиёда(лар) йўқлигига ишонч ҳосил қилганларидан сўнггина ҳаракатланишни давом эттиришлари мумкин.
Изоҳ (0)