Медведев Путинга давлат бошқарувини ислоҳ қилишни таклиф этди

Россия бош вазири Дмитрий Медведев президент Владимир Путинга давлат бошқаруви тизимини такомиллаштириш бўйича комиссия яратиш таклифи битилган мактубни йўналтирди, дея хабар бермоқда «Ведомости» ҳужжат матнига таяниб.

Унда Медведев давлат бошқарувида ҳукумат органлари ўртасида ҳамжиҳатлик йўқлигини, у комплекс вазифаларни бажаришда зарур эканлигини таъкидлади. Шунингдек, бош вазир фикрича, муассасалар ишининг ташкил қилиниши устидан ташқи назорат ҳам мавжуд эмас, давлат бошқаруви тизимининг ўзи эса «кўп ҳолларда собиқ иттифоққа хос жиҳатларни сақлаб қолган, назоратнинг эски усулларига таянади».

Ўз мактубида Дмитрий Медведев ҳар бир вазирлик учун самарадорликнинг асосий кўрсаткичларини (KPI) аниқлаш ва давлат ҳукумати учун тушунарли «ускуналар панели»ни яратишни таклиф қилди. Бош вазир фикрича, вазирлар KPI’га эришиш учун шахсий жавобгарликка эга бўлиши ва «шунчаки топшириқларни бажаргани ҳақида ҳисобот бермаслиги керак».

Медведев ушбу масалаларни кўриб чиқиш учун президент раҳбарлигидаги махсус комиссияни тузишни таклиф этди. Комиссия ўринбосари лавозимига у ўзини таклиф қилди, комиссия аъзолари эса вазирлар, депутатлар, сенаторлар ва экспертлар бўлиши керак.

Тахмин этилишича, комиссия мамлакат ижтимоий-иқтисодий тараққиёти стратегик параметрларини ишлаб чиқишни мувофиқлаштиради. Шунингдек, комиссия вазирликлар ва идоралар қарамоғидаги муассасалар тизимини оптималлаштириш, KPI’га эришишни назорат қилиш, ахборот технологияларини ривожлантириш билан шуғулланади.