Ўзбекистон Республикаси Бош прокуратураси томонидан Халқ таълими вазирлигида «Коррупция – миллий хавфсизликка таҳдид» тарғибот тадбирлари доирасида халқ таълими соҳасида коррупциянинг олдини олиш масаласига бағишланган учрашув ўтказилди. Бу ҳақда Бош прокуратура матбуот хизмати хабар бермоқда.
Видеоконференцалоқа имкониятларидан фойдаланган ҳолда ташкил этилган ушбу учрашувда Халқ таълими вазири, ўринбосарлари, вазирликнинг таркибий тармоқлари раҳбарлари, Қорақалпоғистон Республикаси халқ таълими вазири, Тошкент шаҳар ва вилоятлар халқ таълими бошқармалари бошлиқлари, олий ўқув юртлари ректорлари, халқ таълими муассасалари фаолиятини методик таъминлаш ва ташкил этиш туман (шаҳар) бўлимлари мудирлари иштирок этди.
Тадбирда Бош прокуратура масъул ходимининг халқ таълими соҳасида қонунийлик ҳолати, соҳада коррупциянинг олдини олиш борасида 2015 йилда амалга оширилган чора-тадбирлар мониторинги таҳлили натижалари ҳақидаги маърузаси эшитилди, ушбу йўналишдаги тадбирларнинг сифатини янада ошириш бўйича вазифалар муҳокама қилинди.
Шунингдек, Бош прокуратура томонидан тайёрланган коррупцияни олдини олишга бағишланган видеоматериаллар намойиш этилди. Учрашувда Ички ишлар вазирлиги ва Республика маънавият тарғибот маркази вакиллари ҳам мавзуга доир маърузалар билан иштирок этди.
Тадбир якунида келгусида профилактик тадбирларни амалга ошириш бўйича ҳамкорликдаги комплекс чора-тадбирлар белгилаб олинди.
Изоҳ (0)