Facebook’даги «Водители Ташкента (Drivers.uz)» гуруҳида жамоат транспорти ва жамоат жойларида ҳеч қачон садақа сўрамайдиган, лекин ҳамманинг кўнглини олишга ҳаракат қиладиган отахон ҳақида фотохабар эълон қилинди.
«Бу ғалати йўловчи кўплаб тошкентликларга таниш. Таёқ устида пиёлани ўйнатиб, болалар ва катталарни қувонтиришга ҳаракат қилаётган отахонни метрода, трамвайларда кўриш мумкин. У ҳеч қачон садақа сўрамайди. Лекин уни кўриб қолсангиз, зерикарли сафар вақтида болаларни хурсанд қилишга ҳаракат қилгани учун, кўнгилдан чиқариб ҳеч бўлмаса майда пул беринг», — деб ёзади фотохабар муаллифи.
Фотохабарга фикр билдирганларнинг аксарият отахонни таниган, улар орасида «биринчи марта бундан 10 йил аввал кўргандим», «биринчи марта кўрганимда ҳали мактабда ўқирдим» каби комментларни кўплаб топиш мумкин. Кимдир уни трамвай ва автобусда, яна биров метрода, бошқалар бозорда кўрганини ёзган.
«Кеча Олой бозорида кўргандим, тўхтатдим. Сеҳрли отахон», — деб ёзади бир комментатор. «Умрлари узоқ бўлсин. Ўтган йили метрода кўришгандик. Яхши амаки», — деб ёзган фойдаланувчилардан бири. «Таниш отахон, мен гаплашишга ҳам улгурганман. Ҳаётлари қийин ўтган, умрлари узоқ бўлсин», — деб ёзган бошқа бири. Баъзилар эса унинг соқов экани ҳақида ёзган, бир гуруҳ фойдаланувчилар отахонга моддий ёрдам кўрсатишга тайёрлигини билдирган.
Барча фойдаланувчилар ҳам отахон ва у ҳақидаги илиқ фикрларга бирдек қўшилмаган. Жумладан, улардан бири шундай деб ёзади: «Тамом, отахон учун роса пиар-кампания бўлди. Энди ҳамма уни қидиришга ва молиялаштиришга киришади. Агар уни яна бир бор кўриб қолсам, интернетда жуда машҳурлиги, у ҳақда илиқ фикрлар билдиришаётганини айтиб, селфига тушиб оламан. Хабар муаллифига раҳмат. Кимдир таёқ устида пиёлани ўйнатиб кўрганми? Мен ҳаракат қилганман, умуман ўхшамаган. Шундай экан, иқтидорни излаймиз. Отахон, қаердасиз?».
Изоҳ (0)