Фарғонада олий ўқув юртлари талабалари ўртасида ўтказиладиган Универсиада спорт мусобақаларига қизғин тайёргарлик кўрилмоқда. Бу ҳақда ЎзА хабар бермоқда.
Спорт иншоотлари қайта таъмирдан чиқарилиб, барча шароит яратилмоқда. Иштирокчиларнинг вақти мароқли ўтиши учун ишлаб чиқилган турли маънавий-маърифий тадбирлар дастури доирасида таниқли спортчилар, адиблар, олимлар, маданият ва санъат намояндалари билан учрашувлар, шаҳарнинг диққатга сазовор жойларига саёҳатлар, шоу-концертлар ташкил этиш режалаштирилган.
Мусобақалар бўлиб ўтадиган «Истиқлол» стадиони, теннис корти, Фарғона давлат университети, Фарғона политехника институти, Олимпия захиралари коллежи спорт заллари замон талаблари асосида таъмирдан чиқарилди, зарур спорт жиҳозлари билан таъминланди. Айни пайтда мусобақа иштирокчиларининг яшаши, овқатланиши ва мазмунли дам олиши учун қулай шароит яратиш мақсадида кенг кўламли ишлар амалга оширилмоқда. Талабалар турар жойларида барча қулайликлар яратилмоқда. Компьютер, факс ва телефон билан таъминланган ахборот марказлари ташкил этилмоқда.
Мусобақаларнинг асосий очилиш тантаналари янги бунёд этилган «Истиқлол» стадионида бўлиб ўтади.
Изоҳ (0)