Таиландда Сонгкран фестивали бўлиб ўтган бир ҳафта мобайнида 440 дан ортиқ одам автоҳалокатлар қурбони бўлди

Таиландда маҳаллий Янги йилнинг кириб келиши билан боғлиқ Сонгкран сув фестивали нишонланган бир ҳафта мобайнида инсонларнинг ўлимига олиб келган йўл-транспорт ҳодисалари кўплаб кузатилди. Бу ҳақда мамлакат ички ишлар вазири Анупонг Паочинданинг матбуот анжуманидаги сўзларига таянган ҳолда «ТАСС» хабар бермоқда.

Қиролликдаги энг асосий байрамлардан бири бўлган Сонгкран муносабати билан умуммиллий таътил 13–17 апрель кунларига белгиланган эди. Аммо кўплар байрамни 11 апрель, душанбадан нишонлай бошлади. Етти кун ичида йўлларда 3447 авария рўй бериб, уларда 442 киши ҳалок бўлди, 3656 киши жароҳат олди.

Ички ишлар вазирининг қайд қилиб ўтишича, аксар ҳолларда ЙТҲга маст ҳолда автомобиль бошқариш сабаб бўлган.

Ўтган йилги Сонгкран кунлари инсонларнинг ўлимига олиб келган автоҳалокатлар миқдори бу сафаргидан 20 фоизга камроқ бўлган эди.