Таркибига Süddeutsche Zeitung газетаси кирадиган Seuddeutscher Verlag нашриёти (Германия) Россия президенти Владимир Путиннинг мулоқоти чоғида ушбу нашр эгаси ҳақидаги адашув учун Кремль томонидан расман узр сўралганидан қониқиш билдирди. Бу ҳақда «ТАСС» хабар бермоқда.
«Seuddeutscher Verlag Кремль президент Путиннинг мулоқотида баён қилинган янглиш даъво қайтариб олинганини маъқуллайди», — дейилади нашриёт баёнотида.
Владимир Путин 14 апрель, пайшанба куни бўлиб ўтган тўғридан-тўғри мулоқоти давомида номаълум манба «Панама архиви» материалларини етказган Германиянинг Süddeutsche Zeitung нашри америкаликлар бошқарадиган медиахолдинг таркибига киришини таъкидлаган, бунга «Ҳамма жойдан буюртмачининг қулоғи кўриниб турибди», деб изоҳ берганди.
Газета ижрочи директори Стефан Хильшер Путиннинг баёнотини рад этиб, нашр америкаликларга тўғридан-тўғри ҳам, воситачилар орқали ҳам тегишли эмаслиги, газетани Seuddeutscher Verlag гуруҳи чоп этиши, у эса ўз навбатида Südwestdeutschen Medienholding (81,25 фоиз) холдинги ва нашр асосчилари оиласига (18,75 фоиз) қарашли эканлигини таъкидлаган.
Эслатиб ўтамиз, Россия президентининг матбуот котиби Дмитрий Песков Владимир Путинга Süddeutsche Zeitung Американинг Goldman Sachs банки билан боғлиқлиги ҳақида нотўғри маълумот етказилганлиги учун жазоланганлигини маълум қилган.
Изоҳ (0)