16 апрель, шанба куни Пекинда ШҲТ Бош котиби Рашид Алимов ва Арманистон Республикаси ташқи ишлар вазири Эдвард Налбандян Арманистон Республикасига Шанхай ҳамкорлик ташкилотининг мулоқот бўйича шериги мақомини тақдим этиш тўғрисидаги меморандумни имзолади. ШҲТ котибиятида бўлиб ўтган маросим чоғида ташкилотга аъзо давлатлар дипломатик ваколатхоналари раҳбарлари иштирок этди, дея хабар беради Ўзбекистон Республикаси Ташқи ишлар вазирлиги матбуот хизмати.
ШҲТнинг Мулоқот бўйича шерик мақоми тўғрисидаги низоми ҳамда ташкилот доирасида амал қиладиган бошқа халқаро шартномалар ва ҳужжатларга кўра меморандумда ҳамкорликнинг ўзаро манфаатли асосий йўналишлари белгиланди. Мазкур меморандум имзоланган санадан эътиборан кучга кирди.
Шу тариқа ШҲТга аъзо давлатлар раҳбарлари кенгашининг қатор давлатларга ташкилотнинг мулоқот бўйича шериги мақомини тақдим этиш тўғрисида 2015 йил 10 июлдаги қарорлари тўлиқ амалга оширилди. Илгарироқ Ўзбекистоннинг ШҲТдаги раислиги доирасида Камбоджа Қироллиги, Озарбайжон Республикаси, Непал Федератив Демократик Республикаси билан тегишли меморандумлар имзоланган эди.
Маълумот учун, ҳозирги кунда ШҲТ 6 та аъзо давлат (Қозоғистон, Хитой, Қирғизистон, Россия, Тожикистон ва Ўзбекистон), 6 та кузатувчи давлат (Афғонистон, Беларусь, Ҳиндистон, Эрон, Мўғулистон ва Покистон) ва 6 та мулоқот бўйича шерик давлатни (Озарбайжон, Арманистон, Камбоджа, Непал, Туркия ва Шри-Ланка) ўз ичига олади.
Изоҳ (0)