Франциянинг собиқ президенти Жак Ширакнинг қизи Лоранс Ширак 58 ёшида юрак хуружидан вафот этди. Бу ҳақда «ТАСС» хабар бермоқда.
У 10 апрель, якшанба куни Париждаги Некер номли касалхонанинг интенсив терапия бўлимига ётқизилганди. Аввалига шифокорлар Лоранснинг тўхтаб қолган юрагини юргизиб юборишга муваффақ бўлди, бироқ у барибир комадан чиқмади.
Лоранс Жак Ширакнинг катта қизи бўлиб (қизларнинг кичиги Клод собиқ президент маслаҳатчиси бўлиб ишлаган), 15 ёшида унга анорексия — иштаҳа йўқлиги ва таомланишдан бош тортиш касаллиги ташҳиси қўйилганди. Ўша пайтда бу менингит асорати бўлиши мумкинлиги тахмин қилинган эди. Қизини даволаш учун Жак ва Бернадетт Ширак Франциянинг етакчи мутахассисларига мурожаат этган, бироқ шифокорлар бунга чора топишга ожизлик қилганди.
Жак Ширак ўз эсдаликларида катта қизининг касаллиги «бутун умрининг драмаси» бўлганини тан олганди. Унинг турмуш ўртоғи Бернадетт эса бир неча ўн йилдан бери хайрия йўналишидаги фаолиятининг асосий қисмини мамлакатда анорексияга чалинган беморларга ёрдам беришга қаратган.
Изоҳ (0)