Токио: Японияда ядро қуроли учун ҳуқуқ бор, аммо унга эгалик қилмайди

Япония ҳукумати фикрича, мамлакат конституцияси ядро қуролига эга бўлиш ва ундан фойдаланишни ҳеч қандай даражада тақиқламайди. Бу ҳақда вазирлар маҳкамасининг Япония парламенти депутатларидан бирининг сўровига берилган ёзма жавобида айтилади, деб ёзади «ТАСС».

Унда таъкидланишича, конституциянинг расмий изоҳи мудофаа учун минимал даражада зарур бўлган потенциалга эга бўлишга рухсат беради. «Агар ядро қуроли ушбу мезонга мувофиқ келса, унга эгалик қилиш конституция томонидан тақиқланмайди, — дейилади ҳужжатда. — Бу шундай қурол-яроғлардан фойдаланишга ҳам тегишли».

Шу билан бир вақтда, ҳукумат жавобида Японияда амал қиладиган учта ядросизлик тамойили, мамлакатнинг Ядро қуролини тарқатмаслик шартномасига аъзолиги тилга олинади. «Ушбу омиллар кучда бўлар экан, бизнинг мамлакатимиз, бизнинг фикримизча, ядро қуролига эгалик қила олмайди», — дейилади ҳужжатда.