Тошкентда иқтисодий ҳамкорлик бўйича Ўзбекистон—Япония қўмитасининг 13-йиғилиши бўлиб ўтди. Унда иштирок этиш учун Тошкентга Mitsubishi Corporation катта ижрочи вице-президенти, корпорация бошқаруви аъзоси Хидето Накахара бошчилигидаги Япония ишбилармон доиралари делегацияси келди. Бу ҳақда «Газета.uz» хабар бермоқда.
Йиғилишда икки мамлакатнинг иқтисодий ва инвестицион салоҳияти, турли соҳалардаги ҳамкорликнинг истиқболли йўналишлари тақдимоти бўлиб ўтди. Шунингдек, Япония бош вазири Синдзо Абэнинг Ўзбекистонга расмий ташрифи чоғида эришилган келишувларни амалга оширилиши масалалари муҳокама қилинди.
Ўзбекистон бош вазирининг биринчи ўринбосари, молия вазири Рустам Азимов ўзбек томони япониялик шерикларга нефть-газ, нефть-кимё, кимё, қазиб олиш, машинасозлик, электротехника, тўқимачилик, фармацевтика, замонавий маиший техника ва тиббий жиҳозлар ишлаб чиқариш, сайёҳлик инфратузилмасини ривожлантириш каби йўналишларда истиқболли инвестицион лойиҳаларни таклиф этаётганлигини таъкидлади.
Хидето Накахара ўтган йили икки давлат ўртасида савдо ҳажми 256 миллион долларга етгани, бу эса 2014 йилги кўрсаткичлардан 30 фоизга кўп эканлигини эътироф этиб ўтди. Япон делегацияси таркибида Тошкентга мулоқот учун давлат тузилмалари, хусусий компаниялар вакиллари келганини билдирди.
Изоҳ (0)