Ўзбекистон Республикаси Президенти Ислом Каримов Олий Мажлис Қонунчилик палатаси томонидан 10 март куни қабул қилинган ва Сенат томонидан 31 март куни маъқулланган «Парламент назорати тўғрисида»ги қонунни имзолади. Қонун 12 апрелдан кучга киради. Бу ҳақда «Газета.uz» хабар бермоқда.
Қонунга кўра, давлат бошқаруви идоралари ва мансабдор шахсларнинг Конституция ҳамда қонунлар, парламент палаталари қарорлари, давлат дастурларининг бажарилиши, шунингдек, ўзларига юклатилган вазифаларни амалга ошириши парламент назорати объекти ҳисобланади.
Парламент палаталари, уларнинг қўмита ва комиссиялари, сиёсий партиялар фракциялари, Қонунчилик палатаси депутатлик гуруҳлари ва депутатлари, Сенат аъзолари, Олий Мажлиснинг инсон ҳуқуқлари бўйича вакили (омбудсман) парламент назоратини амалга ошириши мумкин. Қонунда прокуратура идоралари фаолияти устидан парламент назоратини юритиш учун Сенатнинг махсус комиссияси тузилиши алоҳида белгилаб қўйилган. Парламент юқори палатасининг охирги йиғилишида ушбу комиссия таркиби шакллантирилди.
Президент кўриб чиқиши учун ҳукумат аъзолари истеъфоси юзасидан таклифлар бериш, давлат органларига уларнинг фаолияти самарадорлигини ошириш, мансабдор шахсларни жавобгаликка тортиш ёки лавозимидан озод этиш юзасидан таклиф ва тавсиялар тақдим этиш, давлат идоралари ва мансабдор шахсларга фуқароларнинг ҳуқуқ ва манфаатлари, қонунчиликнинг бошқа бузилиш ҳолатларига барҳам беришнинг талаб этилиши парламент назорати натижалари бўлиши мумкин.
Қонунда Олий Мажлис палаталарининг парламент назорати натижаларини кўриб чиқиш юзасидан йиғилишлари очиқ ва ошкора ўтказилиши ҳамда ОАВ ва парламент палаталари сайтларида ёритилиши кўзда тутилган. Зарурат туғилганда бундай йиғилишларни ёпиқ ҳолда ўтказиш тўғрисида қарор қабул қилиниши мумкин.
Изоҳ (0)