Кобралар иштирокида шоу уюштириб танилган индонезиялик хонанда Ирма Бьюл, илон чақиб олгач, саҳнада вафот этди, дея хабар бермоқда The Daily Mail.

Кобра 29 ёшли қўшиқчига концерт чоғида ҳамла қилди, аммо шунга қарамай, у яна 45 дақиқача куйлашда давом этди. Шундан сўнг Бьюл қайт қилиб, танаси чангак бўлиб қолди ва саҳнага йиқилди.

Ҳодиса Ғарбий Ява провинциясининг Караванг аҳоли пунктида содир бўлди. Бьюл қироллик кобрасининг думини тасодифан босиб олгач, жонивор унинг сонидан тишлаб олган. Қўшиқчини касалхонага етказишган, шифокорлар эса унинг ўлимини қайд этган.

Полиция Бьюлнинг ўлими билан боғлиқ вазиятни ўрганишга киришди.