Россиянинг Су-24 самолёти учувчиси Олег Пешковни ўлдирганлигини тан олган Альпарслан Челик Туркия полицияси томонидан қурол тўғрисидаги қонунни бузганлиги учун қўлга олинган. Бу ҳақда Dogan манбаларига таяниб, «ТАСС» хабар бермоқда.
Челик устидан суд россиялик учувчи ҳалокатига айбдорлик эмас, айнан мазкур қонун бузилиши юзасидан бўлиб ўтади. Шунингдек, прокуратура Челик билан боғлиқ материалларни ўрганиш чоғида у аввал 2,5 йиллик қамоқ жазосига ҳукм қилингани, бироқ қандайдир сабабга кўра бу муддатни ўтамаганини аниқлади.
Маълум бўлишича, сўроқ чоғида прокурор Челикдан россиялик учувчи ўлдирилишига оид баёнотларига изоҳ беришни сўраган, бироқ айбланувчининг адвокати мазкур мавзу ишга алоқадор эмаслигини билдирган ва Челик саволга жавоб бермаган.
Эслатиб ўтамиз, Челик ва яна 13 киши 30 март куни Измирдаги ресторанлардан бирида қўлга олинган. Атрофдагилар гуруҳда қурол борлигини пайқаб, бу ҳақда полицияга хабар берган. Уларни қўлга олгандан сўнг полиция гумонланувчилар уйида тинтув ўтказган ва автомат, бир неча тўппонча, ов қуроли, рацияни мусодара қилган. Ҳозирда Челик ва унинг шериклари ҳибсда қолиб, судни кутмоқда. Ҳимоя уларни айбсиз эканликларини таъкидламоқда.
Изоҳ (0)