Оқ уй Россиянинг ядро хавфсизлиги саммитида қатнашмаслигини ўз-ўзини яккалаб қўйиш деб атади

Россиянинг Вашингтондаги ядро хавфсизлиги бўйича саммитда қатнашишдан бош тортиш қарори ўз-ўзини яккалаб қўйишдир. Бу ҳақда Оқ уй вакили Бен Родс журналистлар билан суҳбат чоғида айтиб ўтди, деб ёзади Meduza.

Родс сўзларига кўра, Россия ядро саммити доирасида юқори даражадаги учрашувлардан воз кечиб, потенциал имкониятларни қўлдан чиқармоқда, холос. У аввалроқ Россия саммитда қатнашганини, шунингдек, Москва ва Вашингтон ядро хавфсизлиги масалаларини муҳокама қилишда давом этишини қайд этди.

Россия ташқи ишлар вазирлиги расмий вакили Мария Захарова Россиянинг саммитга бормаслигини, россиялик олий шахсларнинг иштирокини талаб қилувчи ҳеч қандай «қолиб кетаётган муқаррар қарорлар» йўқлиги билан изоҳлаган эди. У, шунингдек, Россия тадбир концепциясидан норози эканлигини айтди: хусусан, саммит доирасида МАГАТЭ, БМТ, Интерпол ва бошқа ташкилотлар учун «кўрсатмалар» ишлаб чиқиш таклиф этилади. Захарованинг сўзларига кўра, бундай тавсиялар чекланган гуруҳ томонидан ўз манфаатларини халқаро ташкилотларга юклаш учун уриниш бўлади, буни эса Россия номақбул деб ҳисоблайди.