Кеча, 29 март куни Мисрнинг Egypt Air авиакомпаниясига тегишли А-320 самолёти гаровга олинди. Бурж ал-Араб–Қоҳира рейсини амалга ошираётган самолётни портлатиб юбориш билан таҳдид қилган шахс уни Туркия томон буриш талабини илгари сурди, лекин ёқилғи камлиги боис А-320 Кипрнинг Ларнака шаҳри аэропортига қўндирилди. Бир қанча вақтдан сўнг барча тутқунлар озод қилинди, жиноятчи эса қўлга олинди.
Шу воқеа муносабати билан «РИА Новости» 2009–2016 йиллар орасида содир этилган самолётларни гаровга олиш ҳолатларини эсга олди.
2014
10 июнь куни Грузия фуқароси Кутаиси–Минск рейсини амалга ошираётган самолётни гаровга олишга уринди. Номаълум йўловчидан экипаж командирига келган хатда авиалайнерни портлатиб юбориш таҳдиди акс этган эди. Унинг муаллифи йўналишни ўзгартириб, Европа давлатларидан бирига учишни талаб қилганди. Самолёт бортида 32 йўловчи, шу жумладан, бир гўдак ҳамда тўрт нафар экипаж аъзоси бор эди. Учувчиларнинг профессионал ҳаракатлари туфайли самолёт Минск аэропортига қўнди. Беларусь Давлат хавфсизлик қўмитаси ходимлари самолёт бортига чиқиб, жиноятчи билан музокара олиб борди. Натижада Грузия фуқароси уларга таслим бўлди.
17 февраль куни «Эфиопия ҳаво йўллари»нинг Аддис-Абеба–Рим рейсини амалга ошираётган лайнери самолёт гаровга олингани ҳақида ишора берди. Boeing 767-300 лайнери Швейцариянинг Женева шаҳрида қўнди. Бортда бўлган 200 кишидан ҳеч ким зарар кўрмади. Самолётни гаровга олган шахс иккинчи учувчи бўлиб чиқди. Биринчи учувчи ҳожатга чиққанида у бошқарув кабинасини қулфлаб қўйиб, борт гаровга олинганини эълон қилган. Самолёт ерга ўтиргач, у полицияга таслим бўлиб, Швейцариядан бошпана сўради.
7 февраль куни Туркиянинг Pegasus Airlines компаниясига тегишли, Харьков–Истанбул рейсини амалга ошираётган самолёт йўловчиси экипажни Россиянинг Сочи шаҳри томон учишга мажбур қилмоқчи бўлди. У бошқарув кабинасига киришга уринди, сўнг самолётни Сочига буришни ҳамда Киевнинг Грушевский кўчасидаги тўқнашувда қўлга олинганларни озод этишни талаб қилди. Шунга қарамай, 110 йўловчини олиб кетаётган ҳаво кемаси Истанбулга муваффақият билан қўндирилди. Украина фуқароси бўлган ҳуқуқбузар полицияга ўзини топширди.
2012
29 июнда Хитойнинг Tianjin Airlines авиакомпанияси самолёти Хэтянь шаҳридан Урумчига парвоз қилаётган чоғда олти нафар жиноятчи кемани гаровга олишга уринди, аммо гуруҳ йўловчилар ва экипаж аъзоларининг ҳаракатлари туфайли зарарсизлантирилди. Олишув пайтида экипаж аъзолари ва йўловчилардан бир нечтасига енгил жароҳат етказилди. Жиноятчилар полицияга топширилди.
2011
24 апрелда Қозоғистоннинг ЮНЕСКОдаги ваколатхонаси маслаҳатчиси Валерий Толмачёв Париждан Римга қараб кетаётган Alitalia компанияси авиалайнерини Ливия пойтахти Триполига буриб юборишга уринди. Маълум бўлишича, у қўлидаги пакки билан стюардессани бўғизлашини айтиб таҳдид қилган. Экипаж аъзолари уни зарарсизлантиришга муваффақ бўлган. Римда дипломат Италия полицияси томонидан ҳибсга олинди. Тиббий кўрик хулосаларига кўра, Толмачёв руҳий хасталикка учраган ҳамда жиноятни содир этиш чоғида кучли стрессдан азият чеккан.
2010
27 ноябрда Теҳрон–Дамашқ рейсини гаровга олишга уринган йўловчи ушланди. Ўша пайтда лайнерда Эрон парламенти аъзолари бўлиб, улар Дамашқда ўтадиган конференцияда иштирок этиши кўзда тутилганди. Бошқа тафсилотлар ошкор қилинмади.
29 июль куни Кавказские Минеральние Води–Москва рейсини амалга ошираётган самолёт «Домодедово» аэропортига қўниши билан йўловчилардан бири томонидан гаровга олинди. Бортда 105 киши, шу жумладан, беш нафар бола ва етти нафар экипаж аъзоси бор эди. Тутқунларни озод этиш шарти сифатида жиноятчи Россия раҳбарияти билан мулоқотни талаб қилди. Бир муддатдан сўнг барча йўловчилар қутқариб олинди. Ҳибсга олинган жиноятчи — Магомед Патиев Қозоғистон фуқароси бўлиб чиқди. У ўз хатти-ҳаракатларини 2010 йили Москва метрополитенида амалга оширилган терактга давлат раҳбарияти эътиборини қаратишга бўлган интилиш билан тушунтирди.
2009
21 октябрда Мисрнинг Egypt Air авиакомпаниясига тегишли, Истанбул–Қоҳира рейсини амалга ошираётган лайнер хавфсизлик хизмати ходимлари кемани Қуддус томон буришни талаб қилган Судан фуқаросини зарарсизлантирди. У самолёт бортидаги тушлик комплектига кирувчи пичоқ билан қуролланган эди.
9 сентябрь куни Мексиканинг Aeromexico авиакомпаниясига тегишли лайнер Канкун–Мехико рейсини бажариш чоғида боливиялик Хосе Флорес исмли шахс томонидан гаровга олинди. У самолётни портлатиб юбориш билан таҳдид қилиб, Мексика президенти Фелипе Кальдерон билан мулоқот сўради. Кейинроқ борт Мексика пойтахтига қўндирилди, жиноятчи эса ҳибсга олинди. Самолётда 104 нафар йўловчи ва саккиз нафар экипаж аъзоси бор эди.
19 апрелдан 20 апрелга ўтар кечаси Ямайка оролининг шимоли-ғарбида жойлашган Монтего-Бэй шаҳридаги Sangster халқаро аэропортида самолёт гаровга олинди. Ўқотар қуролга эга номаълум шахс Галифаксга учиш тараддудидаги Boeing 737 бортига кириб олди. Канаданинг CanJet Airlines компаниясига тегишли ҳаво кемаси бортида 174 йўловчи ва саккиз нафар экипаж аъзоси бор эди. Барча йўловчилар ҳамда экипажнинг икки аъзоси самолётни тарк этишга муваффақ бўлди. Жиноятчининг қўлида экипажнинг олти аъзоси қолди. Уларни озод қилиш бўйича музокараларда Ямайка бош вазири Брюс Голдинг, миллий хавфсизлик вазири ҳамда жиноятчининг отаси иштирок этди. Натижада самолётда қолган олти киши қўйиб юборилди. Жиноятчи террорчи бўлмай, балки руҳий хасталикка чалинган шахс эканлиги айтилди.
Изоҳ (0)