23 март, чоршанба куни Флорида штатидаги Канаверал бурнидан Cygnus юк кемаси бўлган Atlas V ракетаси Халқаро коинот станциясига (ХКС) йўл олди. Бу ҳақда «РИА Новости» хабар бермоқда.
Парвоздан беш дақиқа ўтгач, Cygnus ташувчи ракетанинг биринчи, 22 дақиқа ўтиб, иккинчи устунидан ажралди. Кеманинг 26 март, шанба куни ХКСга етиб бориши ва туташуви мўлжалланган. ХКС экипажи учун озиқ-овқат ва биринчи эҳтиёж буюмларидан ташқари, юк кемаси орбитага метеорлар ва кичик йўлдошлар кимёвий таркибини ўрганиш қурилмаси, очиқ коинотга чиқиш учун скафандрлар ҳамда станция ҳаво таъминоти тизими учун зарур бўлган ҳаво цилиндрларини етказиши кўзда тутилган.
Cygnus эгаси бўлган Orbital ATK компанияси NASA билан шартномага биноан ХКСга парвозларни амалга оширади. Мазкур парвоз 2014 йил октябрида компанияга тегишли бўлган ва Cygnus юк кемасини орбитага чиқариши лозим бўлган Antares ракетаси портлаганидан бери иккинчиси бўлди.
Изоҳ (0)