«Йўл ҳаракати қоидаларини бузсам, ишхонамга телефон қилинг». «Korzinka.uz»нинг хизмат машинасидаги эълон

«Korzinka.uz» супермаркетлар тармоғига тегишли юк ташувчи автомобиллардан бирининг орқа томонига «Мен йўл ҳаракати қоидаларини буздимми? Унда 140-14-14 рақамига қўнғироқ қилинг!», деган эълон ёпиштирилган. Автомобильнинг сурати Facebook’даги «Водители Ташкента» гуруҳида эълон қилинган.

Фотохабарга фойдаланувчилар турлича муносабат билдирган. Баъзилар худди шундай амалиёт АҚШда ва Европа мамлакатларида ҳам борлигини таъкидлаган. Бошқа бир фойдаланувчи эса шунга ўхшаш эълонларни йўналишли таксилар («маршрутка»лар)да ҳам кўрганини ёзган.

«Хўш, телефон қилдингиз ҳам дейлик, кейин нима бўлади? Жаримани сизга тўлайдими? «Korzinka.uz» ҳаммаёқда пиар қилишга ҳаракат қилади», — деб ёзади бир фойдаланувчи.

«Компания мулкини хавф остига қўяётган ҳайдовчига нисбатан хайфсан эълон қилинади. Балки ишдан ҳам бўшатишар, чунки бу ўринга даъвогарлар кўп», — деб ёзади бошқа бир фойдаланувчи.

«Ҳар турли аҳмоқ ёшлар шунчаки кўнгилхушлик учун қўнғироқ қилиб, машина қизил чироққа ўтиб кетгани, сидирға чизиқни босиб ўтгани ва киракашлик қилаётгани ҳақида айтса, нима бўлади?», — деб савол қўйган яна бир фойдаланувчи.