Россиянинг Самара вилояти собиқ губернатори Константин Титов полицияга мурожаат қилиб, фирибгарлар гуруҳига нисбатан жиноий иш қўзғатишни сўради, улар ўзларини «президент маъмуриятининг махфий молиявий гуруҳи» ходимлари сифатида таништириб, ундан қарийб олти миллион доллар ўғирлаган. Бу ҳақда Meduza хабар бермоқда.
Иш ҳужжатларида айтилишича, 2007 йил кузида ўша вақтда Федерация Кенгаши аъзоси бўлган Титов Анатолий Шутов исмли шахс билан танишган, у ўзини адлия генерали ва Бош прокуратура ходими сифатида таништирган. У Титовга, гўёки, бевосита Россия президенти Владимир Путинга бўйсунадиган ва катта фоизлар эвазига маблағларни инвестиция қилиш билан шуғулланадиган «Марказ» махфий гуруҳига инвестиция киритиб фойда олишни таклиф қилган.
Титовга камида 500 минг доллар сармоя киритса, 100 фоизгача даромадни ваъда қилишган. У рози бўлиб, банк соҳасида ишлайдиган ўғлидан 4,4 миллион доллар ва 1,5 миллион евро қарз олган. 2007 йил октябрида у пулларни топширган, воситачи сифатида, жумладан, «ЦСКА» футбол клуби собиқ раҳбари Александр Барановский иштирок этган.
Бироқ Титовга на пулларни, на улардан фоизни беришди. У ўша вақтда давлат лавозимини эгаллагани ва воқеага диққатни жалб этишни истамагани учун полицияга ҳодисадан саккиз йил ўтгачгина мурожаат қилган.
Иш фигурантларидан бири Артур Куралаев айбини бўйнига олиб, судга келишини тасдиқлади. У 2009 йилдан буён бошқа бир фирибгарлик ҳақидаги иш бўйича қамоқ муддатини ўтамоқда.
Изоҳ (0)