Тергов сиёсатчи Борис Немцовни ўлдиришда гумонланаётганлар шахсини жиноятни режалаштириш учун махсус сотиб олинган телефондан бўлган тасодифий қўнғироқ орқали аниқлаган. Бу ҳақда ҳуқуқни ҳимоя қилиш органларидаги манбаларига таяниб, «Коммерсантъ» хабар бермоқда, деб ёзади Meduza.
Қотилликдан сўнг дарҳол терговчилар жиноят жойида сим-карталари сохта шахслар номига сотиб олинган телефонлардан фойдаланган бир неча киши бўлганини аниқлади. Бироқ қотилликдан сўнг ушбу телефонларни ҳеч ким ишлатмаган ва телефонлар эгалари қаердалигини аниқлаб бўлмаган. Қотилликдан икки кун ўтгач, бундай сим-карталарнинг биридан Ингушетияга қўнғироқ қилинди. Терговчилар қўнғироқ аввалроқ Анзор Губашев (Немцовнинг ўлдириб кетилиши ҳақидаги иш фигурантларидан бири) номига олинган сим-карта қўйилган телефондан амалга оширилганини аниқлади. Унинг кимлар билан алоқага чиққани ўрганилгач, яна тўрт нафар гумонланувчи аниқланди ва ҳибсга олинди.
Тергов маълумотларига кўра, Губашев асосий телефон рақами ҳисобида пул тугаб қолгани сабабли, жиноятни режалаштириш учун сотиб олинган сим-картадан қўнғироқ қилган. Бешала гумонланувчи қотилликни режалаштиришда фойдаланган телефонларни терговчилар топа олмади.
Изоҳ (0)