Европа Чемпионлар Лигаси: «Барселона» — «Арсенал». Превью

Футбол бўйича Европа Чемпионлар Лигаси нимчорак финали доирасидаги «Барселона» ва «Арсенал» қарама-қаршилигининг дастлабки учрашувида каталонияликлар 2:0 ҳисобида ғалаба қозониб, чорак финал томон залворли қадам ташлаган эди.

Биринчи ўйиндан сўнг

Ички чемпионат натижалари билан солиштирганда ҳам «Барселона»нинг имконияти анчагина яхши экани кўринади. Луис Энрике жамоаси Лондондаги тўқнашувдан кейин 4 та ўйин ўтказиб, уларнинг барчасида зафар қучди — бу учрашувларнинг учтасида йирик ҳисоб қайд этилган.«Арсенал» эса «Барселона»га қарши биринчи ўйиндан кейин қатор муваффақиятсизликларга дуч келди. Ўтказилган 5 та ўйиннинг 3 таси бой берилди ва бир дуранг қайд этилди. Ягона ғалабанинг қадри ҳозирги кунга келиб қолгани йўқ — ўшанда «Халл Сити»ни Англия Кубогидан чиқариб юборган Венгер шогирдларини кейинги босқичда «Уотфорд»га имкониятни бой берди.

Ўзаро ўйинлар

«Барселона» ва «Арсенал» ўртасидаги сўнгги бешта ўйин мисолида Испания суперклуби яққол фаворит эканини кўриш мумкин — 3 ўйинда «Барселона» зафар қучган, фақатгина битта баҳсда «Арсенал» ғалаба қозонган. «Камп Ноу»да кечган сўнгги икки ўйинда «Арсенал» рақибига етарлича қаршилик кўрсата олмаган: 2010 йил 1:4, 2011 йил 1:3.

Жароҳатлар

«Арсенал» жароҳатлардан энг кўп азият чекадиган клублар сирасига киради. Ҳозир ҳам Венгер шундай муаммо қаршисида турибди. Франциялик мутахассис Петр Чех, Томаш Росицки, Алекс Окслейд-Чемберлен, Санти Касорла, Аарон Рэмзи, Жек Уилшир, Габриэль, Микель Артета кабиларнинг хизматидан фойдалана олмайди.

«Барселона»нинг ҳолати нисбатан яхшироқ — Луис Энрике таркиб танлашда Рафинья ва Сандро Рамиресга умид боғламайди. Пике эса дисквалификация сабаб учрашувни ўтказиб юборади.

Ўйинолди фикрлар

Лоран Косельни, «Арсенал» ҳимоячиси: «‘Барселона’ билан ўйинда босимнинг йўқ экани ‘Арсенал’ фойдасига ишлайди».

Луис Энрике, «Барселона» бош мураббийи: «Лондонда қайд этилган ҳисоб жавоб ўйинига таъсир кўрсатади».

Марк-Андре тер Штеген, «Барселона» дарвозабони: «‘Арсенал’ ҳужумда хавфли, ҳимоямиз хушёрликни йўқотмаслиги керак».

Арсен Венгер, «Арсенал» бош мураббийи: «‘Барселона’ ҳужум чизиғида қандай сеҳргарлар ўйнашини унутмаслигимиз керак».

Ҳакам

Учрашувни россиялик ФИФА рефериси Сергей Карасёв бошқариб боради.

Трансляция

«Барселона» — «Арсенал» ўйини Тошкент вақти билан 17 мартга ўтар кечаси 00:45 да бошланади. UzReport телеканали тўғридан-тўғри эфирда «Бавария» — «Ювентус» учрашувини намойиш қилишни режалаштирган, шу сабаб, «Камп Ноу»даги учрашув Ўзбекистон телеканаллари орқали намойиш этилмайди.

Куннинг бошқа бир муҳим учрашуви:

• Европа Чемпионлар Лигаси: «Бавария» — «Ювентус». Превью