Футбол бўйича Италия терма жамоаси бош мураббийи Антонио Конте Евро—2016 якунлангач, лавозимини тарк этади. Бу ҳақда, «Чемпионат.com» хабарига кўра, Италия футбол федерацияси президенти Карло Тавеккио расман эълон қилди.
«Конте Европа чемпионатидан кейин Италия терма жамоасидаги ваколатларини топширади. Биз унинг ўз фаолиятини клуб даражасида давом эттириш истагини ҳурмат қиламиз», — дейди Карло Тавеккио.
Аввалроқ Контенинг 2016 йил ёзида Лондоннинг «Челси» клубини қабул қилиб олиш эҳтимоли борлиги ҳақида хабар берилган эди.
Антонио Контедан сўнг Италия терма жамоасини, катта эҳтимол билан, Роберто Донадони («Болонья» бош мураббийи) қабул қилиб олади. Ундан ташқари «Сассуоло» устози Эусебио ди Франческо ҳам даъвогарлар рўйхатида бор.
Конте 2014 йилнинг август ойидан буён Италия терма жамоасини бошқариб келади. Унинг қўл остида терма жамоа Евро—2016 саралаш «H» гуруҳида 1-ўринни якунлади. Хорватия, Норвегия, Болгария, Озарбайжон, Малта каби термалар ўрин олган гуруҳда Италия 10 беллашувнинг 7 тасида зафар қучди ва 3 та ўйинда дуранг ўйнади.
2016 йилнинг 10 июнь куни Францияда старт оладиган Евро—2016 да Италия терма жамоаси ўз гуруҳида Бельгия, Швеция ва Ирландияга қарши баҳс олиб боради.
Изоҳ (0)