Европа Чемпионлар Лигаси: «Бавария» — «Ювентус». Превью

Футбол бўйича Европа Чемпионлар Лигаси нимчорак финали доирасидаги «Бавария» ва «Ювентус» қарама-қаршилигининг дастлабки учрашувида 2:2 ҳисобидаги дуранг қайд этилган эди. Бу жавоб ўйинидаги интригани янада ошириб юборди.

Биринчи ўйиндан сўнг

Ҳар икки клуб ички чемпионатда бештадан ўйин ўтказди. Натижаларда тенглик: учтадан ғалаба, бир дуранг ва бир мағлубият. «Ювентус» Италия кубоги ярим финалида «Интер»дан 0:3 ҳисобида енгилиб, кейинроқ пенальтилар сериясида финал чиптасини қўлга киритди. «Бавария» эса кутилмаганда ўз майдонида «Майнц»га имкониятни бой берди – 1:2.Айни пайтда ҳар икки клуб ўз мамлакати чемпионатида пешқадам бўлиб турибди. «Бавария» энг яқин тақибчиси — Дортмунд «Боруссия»сини 5 очколик фарқ билан ортда қолдираётган бўлса, «Ювентус» «А» Серияда «Наполи»дан 3 очко ўзиб кетган.

Ўзаро ўйинлар

«Бавария» ва «Ювентус» ўртасидаги сўнгги бешта қарама-қаршиликда туринликлар зафар қуча олмади: 2 та дуранг ва 3 та мағлубият. Мюнхенда ўтган сўнгги икки ўйинда Италия суперклуби гол уришнинг уддасидан чиқа олмаган: 2010 йилда 0:0, 2013 йилда 0:2. Массимилиано Аллегри жамоаси чорак финалга йўл олишни истаса, энг камида 1 та гол уришига тўғри келади.

Жароҳатлар

«Ювентус»нинг аҳволи бироз оғир — жамоанинг етакчи футболчиларидан Дибала ва Келлини ўйинни ўтказиб юборади. Асамоа, Касерес, Сандро кабиларни ҳам улар қаторига қўшиш мумкин. «Бавария»да эса Бадштубер, Боатенг, Хави Мартинеснинг жароҳати бор.

Ўйинолди фикрлар

Хосеп Гвардиола: «Биринчи ўйиндан кейин ‘Ювентус’ни янада кўпроқ ҳурмат қила бошладим».

Пауло Дибала: «‘Бавария’га қарши ўйнай олмаслигимни билганимдан сўнг, ўзимни қўярга жой топа олмадим».

Филипп Лам: «‘Ювентус’ ‘Бавария’нинг хато қилишини кутиб тўп суради».

Фабио Капелло: «‘Бавария’ ‘Ювентус’дан кучлироқ».

Франк Рибери: «Биз ‘Ювентус’га қарши ўйинда дуранг учун ўйнамоқчи эмасмиз».

Лотар Маттеус: «‘Ювентус’ ҳужумкор футбол намойиш этмайди».

Жанлуиджи Буффон: «Бизда ‘Бавария’ни ортда қолдириш учун яхши имконият бор».

Массимилиано Аллегри: «Таркибдаги йўқотишлар, албатта, ачинарли. Лекин бундан фожеа ясамаслик керак».

Ҳакам

Мюнхендаги Allianz Arena стадионида бўлиб ўтадиган учрашувни швециялик Йонас Эрикссон бошқариб боради.

Трансляция

«Бавария» — «Ювентус» учрашуви Тошкент вақти билан 17 мартга ўтар кечаси соат 00:45 да бошланади. Мазкур беллашув UzReport телеканали орқали тўғридан-тўғри намойиш этилади.

Куннинг бошқа бир муҳим учрашуви:

• Европа Чемпионлар Лигаси: «Барселона» — «Арсенал». Превью