ОАВ: «Челси» Златан Ибрагимовичга умумий қиймати 25 млн еврога тенг икки йиллик шартнома таклиф қилди

Франциянинг «ПСЖ» футбол клуби билан амалдаги шартномаси 2016 йилнинг июнь ойида якунига етадиган швециялик ҳужумчи Златан Ибрагимовичга бир қатор клублар қизиқиш билдирмоқда. Бу ҳақда, Footmercato’га асосланиб, «Chempionat.com» хабар бермоқда.

Футболчига даъвогарлик қилаётганлар орасида «Манчестер Юнайтед», «Челси», «Милан» ва MLS’нинг бир қатор жамоалари бор.

Хусусан, 34 ёшли ҳужумчи фаолиятини Лондоннинг «Челси» клубида давом эттирадиган бўлса, икки мавсум давомида йилига 12,5 миллион евродан маош олади.

Агар Жозе Моуриньо «Манчестер Юнайтед» бош мураббий этиб тайинланса, у ҳолда Ибрагимович «қизил иблислар» вариантини афзал билиши мумкин.

Футболчининг рафиқаси эса «Милан»га қайтишини хоҳламоқда — футболчи 2010—2012 йилги мавсумларда Италиянинг айнан шу жамоаси шарафини ҳимоя қилган.

Маълумот учун, Ибрагимович жорий мавсум Франция чемпионатида ҳозиргача 24 учрашувда майдонга тушиб, 27 та гол урди.