15 мартга ўтар кечаси Англия Премьер-лигасининг 30-тури доирасида пешқадам «Лестер» лигада жон сақлаб қолиш йўлида кураш олиб бораётган «Ньюкасл»ни қабул қилди. Клаудио Раньери шогирдлари япониялик Синдзи Оказакининг 25-дақиқада киритган ягона голи эвазига муваффақият қозонди.
Шу тариқа, «Лестер» мавсум якунига саккизта тур қолганида энг яқин таъқибчиси — Лондоннинг «Тоттенхэм» клуби билан очколари фарқини яна 5 тага етказиб олди. Маълумот учун, Франция чемпионати якунига саккиз тур қолганида чемпион жамоа аниқланганди.
«Ньюкасл» 29-турдаги ўйинни ўз майдонида дебютант «Борнмут»га бой берганидан кейин амалдаги бош мураббий Стив Макларен истеъфога чиқарилиб, унинг ўрнига Мадриднинг «Реал»идан бўшатилган ва 4 январдан буён ишсиз юрган Рафаэль Бенитес тайинланганди. Испаниялик мутахассис Англия Премьер-лигасидаги энг шимолий клуби билан биринчи ўйинни бой берди. У Премьер-лигада 2004—2010 йиллар оралиғида «Ливерпуль» клубига, 2012/2013 йилги мавсумда «Челси»га устозлик қилган.
«Ньюкасл»нинг кетма-кет мағлубиятлари сонини 4 тага етказди. «Лестер» эса ўзининг сўнгги уч ғалабасини фақатгина 1 та гол уриб, қўлга киритди. 30-турдан кейин «Лестер» 63 очко билан лига карвонбошиси бўлиб турибди, «Тоттенхэм» 58 очко жамғарган. Улардан 1 та кам ўйинда майдонга тушган «Арсенал» ҳисобида 52 очко мавжуд. «Ньюкасл» эса ҳисобида 1 та захира ўйини бор ҳолатида 24 очко билан 20 та клуб орасида 19-ўриндан жой олган. Захира ўйини «Манчестер Сити»га қарши бўлиб ўтади.
АПЛ 30-туридан жой олган 5 та учрашув Англия Кубоги чорак финал ўйинлари сабаб ўтказилмади.
АПЛ, 30-тур.
Изоҳ (0)