Франция чемпионати 30-турида «ПСЖ» клуби сафарда «Труа» жамоаси меҳмони бўлди. Мазкур ўйинда парижликлар 9:0 ҳисобида зафар қучиб, муддатидан аввал Франция чемпионига айланди, деб хабар бермоқда «Чемпионат».
Мазкур ўйинда «ПСЖ» етакчиси Златан Ибрагимович тўртта гол киритиб, покер муаллифи бўлди. Шунингдек, Эдинсон Кавани иккита, Адриен Рабио ва Хавьер Пасторе биттадан гол киритди. Яна битта голни «Труа» аъзоси Матьё Сонье ўз дарвозасига киритиб қўйди.
Шу тариқа, Лоран Блан қўли остидаги «ПСЖ» жамоаси муддатидан аввал мамлакат чемпионига айланди. Ҳозирда Париж клуби ҳисобида 77 очко мавжуд. Унинг энг яқин таъқибчиси «Монако» 25 очкога ортда қолмоқда.
Қайд этиш керакки, «ПСЖ» жамоаси Франция чемпионлигини чемпионат якунланишига 8 тур қолганида қўлга киритди ва шу орқали янги рекорд ўрнатди. Аввалги рекорд «Лион» клубига тегишли эди. 2006/07 йилги мавсумда «Лион» чемпионат якунланишига 5 тур қолганида Франция чемпионлигини қўлга киритган эди.
Маълумот учун, «ПСЖ» жамоаси қаторасига тўртинчи, умумий ҳисобда эса олтинчи бор Франция чемпиони бўлди.
Франция чемпионати, 30-тур
«Труа» – «ПСЖ» – 0:9 (0:3)
Голлар: Кавани, 13 (0:1); Пасторе, 17 (0:2); Рабио, 19 (0:3); Ибрагимович, 46 (0:4); Ибрагимович, 52 (0:5); Ибрагимович, 55 (0:6); Сонье, 59 (0:7, автогол); Кавани, 75 (0:8); Ибрагимович, 88 (0:9).«Труа»: Дрейер, Нгонга (Карабуэ, 64), Дабо (Конфе, 46), Сонье, Ринкон (Марсьяль, 86), Камю, Шавьер, Ниве, Пи, Жан, Гуйе.
«ПСЖ»: Трапп, Тиаго Силва, Курзава, ван дер Вил (Маркиньос, 46), Давид Луиз, Пасторе, Стамбули, Рабио (Максвелл, 61), Ди Мария (Лукас, 61), Кавани, Ибрагимович.
Амалга оширилмаган пенальти:Кавани (75).
Огоҳлантириш: Шавьер (73).
Четлатиш: Карабуэ (74).
Изоҳ (0)