Спорт ускуналарини ишлаб чиқарувчи Head компанияси допинг қабул қилганлиги фош бўлган россиялик теннисчи Мария Шарапова билан шартномани узайтириш ниятини маълум қилди, деб ёзади «ТАСС» The Times нашрига таяниб.
Ўз баёнотида компания Шарапованинг жасоратини қўллаб-қувватлади. «У (допинг ҳақида) баёнот бериб ва ўз хатосини тан олиб кўрсатган одиллиги ва жасорати таҳсинга сазовор», — дейилади матнда. «Head Марияни ҳозир ва келажакда ҳам қўллаб-қувватлашидан фахрланади, ва биз у билан шартномани узайтирмоқчимиз».
Head’дан ташқари, россиялик теннисчи айни пайтда Nike, Cole Haan, TAG Heuer, Samsung, Evian ва Porsche компаниялари билан олтита шахсий ҳомийлик шартномаларига эга.
Аввалроқ россиялик теннисчи, дунёнинг энг бой аёл спортчиси Мария Шарапова Лос-Анжелесдаги махсус матбуот анжумани чоғида 2016 йилги Австралия очиқ чемпионатида ундан олинган намуналарда тақиқланган дори — мельдоний топилганини тан олди. Халқаро теннис федерацияси (ITF) россиялик спортчи 12 мартдан бошлаб барча мусобақалардан четлатилишини маълум қилди.
Изоҳ (0)