Сайёрадаги энг кекса эркак дея холокостни бошидан кечирган 112 ёшли исроиллик Исраэль Криштал тан олинди, дея хабар бермоқда «РБК». Бу ҳақдаги маълумот Гиннеснинг Рекордлар китоби расмий сайтига жойланди.
«Узоқ умр кўриш сирини билмайман. Барчаси олдиндан белгилаб қўйилади деб ишонаман. Мен ўзимдан кўра ақллироқ, кучлироқ ва чиройлироқ бўлган одамларни кўрганман, аммо улар ўлиб кетди», — деди Криштал Guinness World Records раҳбаридан рекорд ҳақидаги гувоҳномани олаётиб.
2016 йил 12 март ҳолатига кўра, Кришталнинг ёши 112 йил-у 179 кунни ташкил этмоқда.
Криштал 1903 йил 15 сентябрда Польшада туғилган. У иккита жаҳон урушини бошидан кечирди ва Освенцим концлагерида омон қолди. Озод этилган вақтда Криштал 37 кг тош босган. Айни пайтда у Исроилнинг Хайфа шаҳрида ўз оиласи билан яшамоқда.
Энг кекса эркак номи Кришталга япониялик Ясутаро Коидедан ўтди, у 2016 йил январида 112 ёшида вафот этган эди.
Изоҳ (0)