«Мустақил Давлатлар Ҳамдўстлигига аъзо мамлакатларнинг ташқи чегараларида чегара хавфсизлигига таҳдидларга тезкорлик билан жавоб кўрсатиш учун чегара муассасалари мутахассисларидан иборат қўшма гуруҳларни шакллантириш ва улардан фойдаланиш тартиби ҳақидаги битимни ратификация қилиш тўғрисида»ги федерал қонун лойиҳаси Россия президенти Владимир Путинга ратификация учун тақдим этилди, деб ёзади «ТАСС». Ҳукумат сайтида эълон қилинган ҳужжат Россия Ташқи ишлар вазирлиги ва Федерал хавфсизлик хизмати томонидан киритилган.
«Битимга мувофиқ, МДҲ мамлакатларининг ташқи чегараларида чегара хавфсизлигини таъминлаш бўйича чегара муассасалари мутахассисларидан иборат қўшма гуруҳлар фаолиятини шакллантириш, улардан фойдаланиш ва уларни тугатиш тартиби ўрнатилади», — дейилади ҳужжатда.
МДҲ чегараларида хавфсизликни таъминлаш бўйича битим 2014 йил 10 октябрда Минскда имзоланган эди. У Россия қонунчилигида кўзда тутилган қоидалардан фарқли қоидаларни ўз ичига олгани туфайли Россия президенти томонидан ратификация қилиниши керак.
Изоҳ (0)