Евроиттифоқ шу баҳорда Зика вируси Европа қитъасида тарқалиб кетиши хавфига қарши кураш учун 10 миллион евро ажратди, дея хабар бермоқда «ТАСС». Бу ҳақда молиявий барқарорлик, хизматлар ва капитал бозори масалалари бўйича еврокомиссар Жонатан Хилл Европарламентнинг Страсбургдаги сессиясида айтиб ўтди.
«Жорий йилнинг баҳор ва ёзида Aedis Aegypti туридаги чивинлар касаллик Европада тарқалишига олиб келиши мумкин. Айни пайтда Зика вируси вакцинаси мавжуд эмас. Шу туфайли уни ишлаб чиқиш учун анча куч сарфланмоқда. Европа иттифоқи, ўз томонидан, бунга 10 миллион евро ажратди, ва бу ҳали биринчи босқич», — деди Хилл.
Унинг таъкидлашича, фармакология масалалари билан шуғулланадиган Дори воситалари бўйича Европа агентлиги «вакцина ишлаб чиқиш мақсадида экспертларнинг махсус гуруҳини тузди». «У, шунингдек, бундай тадқиқотлар олиб бориш ниятида бўлган фармакология корпорациялари билан алоқада бўлиб турибди», — дея қўшимча қилди у.
Изоҳ (0)