АҚШ мудофаа вазирлиги мамлакат ҳудудида ҳарбий операциялар билан боғлиқ бўлмаган мақсадларда жосуслик дронлари қўлланишига оид ҳисоботни чоп этди. АҚШ бош инспектори мазкур ҳисоботни 2015 йил 20 мартда тайёрлаган, бироқ шу пайтгача ҳужжат эълон қилинмаганди. Бу ҳақда Meduza хабар бермоқда.
Ҳисоботга кўра, 2006—2015 йиллар оралиғида АҚШда учувчисиз ҳаво қурилмаларидан кўпи билан 20 маротаба фойдаланилган. Ҳужжатда дронлар иштирок этган операцияларнинг тафсилотлари келтирилмаган бўлса-да, Пентагон сайтида жойлаштирилган рўйхатдан маълум бўлишича, қурилмалар қидирув-қутқарув амалиётлари, тошқинлар ва ёнғинлар, шунингдек, Миллий гвардия машғулотларида қўлланилган.
Вазирлик уларнинг ишлатилиши қонуний бўлганини билдирмоқда. 2015 йилда АҚШ мудофаа вазирлиги дронлардан фойдаланишнинг янги қоидаларини маъқуллади. Жумладан, учувчисиз қурилмалардан мамлакат ҳаво ҳудудида фойдаланиш учун вазирлик раҳбарининг розилиги талаб этилади.
Изоҳ (0)