Чеченистон раҳбари Рамзан Қодиров «Интерфакс» нашрига берган интервьюсида Россия раҳбарияти билан лавозимидан кетиш, сўнг ўрнини ким босиши масаласини муҳокама қилмаганини айтди.
«Бундай саволларни эълон қилишнинг ўз қоидалари бор. Эълон қилиш бўйича биринчилик Кремлга тегишли. Ваколатим муддати тугашига ҳали бир ойдан кўпроқ вақт бор… Фақат мен ҳақимда гапиришади, ҳаттоки, об-ҳаво ўзгариб қолса ҳам. Кимларгадир халал бераётганга ўхшайман. Кимга? Халққами? Раҳбариятгами? Йўқ, албатта! Ёки давлат департаментининг ҳамтовоқларигами? Эҳтимол, ҳа! Россия душманлари тарафига ўтиб олганларга нисбатан фикрим, ким бўлиб ишлашимдан қатъий назар, ўзгармайди», — деди Қодиров.
Чеченистон раҳбари эҳтимолий ўринбосарлар ҳақида гапирар экан, Аҳмадҳожи томонидан асос солинган жамоада муносиб кишилар борлигини таъкидлади.
«Ушбу масала бўйича ҳар қандай қарорни Россия президенти Владимир Путин қабул қилади. Мен эса ‘Хўп бўлади!’ — деб айтадиган пиёда аскарман», — деди у.
Эслатиб ўтамиз, олдинроқ Россия президенти матбуот котиби Дмитрий Песков Рамзан Қодировнинг келгуси тақдири ҳақидаги қарор унинг ваколати тугаганидан сўнг қабул қилинишини билдирганди.
Қодировнинг ўзи эса мамлакат раҳбарияти унинг ўрнига бошқа кишини топиши зарурлигини маълум қилган, унинг ваколатларини узайтириш учун митинг ва бошқа акциялар ўтказмасликни сўраган эди.
Қодировнинг Чеченистон Республикаси раҳбари лавозимидаги ваколати муддати 2016 йил 5 апрелда тугайди.
Изоҳ (0)