Apple бош ҳуқуқий маслаҳатчиси Telegram’ни мутлақо бузиб бўлмайдиган ва зарарли деб атади

1 март куни АҚШ Федерал қидирув бюроси директори Жеймс Коми ва Apple бош ҳуқуқий маслаҳатчиси Брюс Сьюэлл сан-бернардинолик мерганнинг iPhone’идаги маълумотларни расшифровка қилиш ҳақидаги иш бўйича тинглашлар доирасида Конгресс аъзолари қаршисида нутқ сўзлади, дея хабар бермоқда TJournal.

Конгресс раиси таъкидлашича, Apple охир-оқибат террорчининг смартфонидаги паролни аниқлашни енгиллаштириш учун махсус прошивка чиқарадиган бўлса, ФҚБ парол ёки шифрлаш алгоритмлари орқали блокланадиган бошқа дастурларга ҳам дуч келиши мумкин. Бироқ ФҚБ ушбу маълумотларни қўлга кирита олмайди, агар сервисларга эгалик қилувчи компанияларнинг ўзлари уларни тақдим этмаса.

Сьюэлл раиснинг далилларига қўшилди ва бундай дастурлардан бири Telegram эканлигини айтди, бироқ у янглишиб, уни бир неча марта Telegraph деб атади.

«Террорчилар томонидан фойдаланиладиган энг зарарли дастурлардан бири бу Telegraph деб аталадиган нарсадир. Telegraph ҳар қандай телефонда мавжуд бўлиши мумкин, у Apple билан умуман боғлиқ эмас, уни АҚШдан ташқарида ҳам интернет орқали юклаб олиш мумкин. Ва бу мутлақо бузиб кириб бўлмайдиган коммуникация усулидир.

Агар Apple’ни ўнлаб ёки юзлаб миллион бегуноҳ кишиларга тегишли смартфонлар хавфсизлигини пасайтириш учун янги операцион тизим яратишга мажбур қилишса, бу бизнинг хавфсизлигимизга зарба беради, аммо террорчиларга таъсир қилмайди», — деди Apple бош ҳуқуқий маслаҳатчиси.