Тошкент шаҳри кўчаларида 1 март арафасида янги — «Фото- ва видео қайд этиш» қўшимча ахборот белгилари пайдо бўлди. Бу ҳақда Facebook’даги «Водители Ташкента» гуруҳида фотохабар қолдирилган.
Хабарга илова қилинган фотосуратда 7.19. йўл белгисидан кўп ўтмай, қоидабузарликларни қайд этувчи кузатув камералар йўл устига жойлаштирилганини кўриш мумкин.
Вазирлар Маҳкамасининг 2015 йил 24 декабрдаги қарорига мувофиқ, 2016 йил 1 мартдан бошлаб Ўзбекистонда янги таҳрирдаги йўл ҳаракати қоидалари кучга кирди. Қоидаларнинг янги таҳририга янги йўл белгилари, хусусан, «Фото- ва видео қайд этиш» қўшимча ахборот белгиси ҳам киритилган.
Аввалроқ Ўзбекистон Ички ишлар вазирлиги Йўл ҳаракати хавфсизлиги бош бошқармаси матбуот хизмати раҳбари муовини Мансур Риҳсиев Тошкент йўллари ва чорраҳаларига ўрнатилган кузатув камералари айни вақтда синов тартибида ишлаётгани, камералар тўлиқ тартибда ишга тушишидан 10 кун аввал бу ҳақда ОАВ орқали жамоатчиликка хабар берилишини маълум қилганди.
Изоҳ (0)