«Омон қолган» фильмидаги ижроси учун АҚШ киноакадемияси томонидан 2015 йилнинг энг яхши актёри деб топилган ва ўз фаолиятидаги илк «Оскар»ни қўлга киритган Леонардо Ди Каприо узоқ кутилган ҳайкалчани ресторанда унутиб қолдирди. Бу ҳақда TMZ маълум қилди.
Ди Каприо ва унинг ҳамкасблари Лос-Анжелесдаги ресторанлардан бирида мукофотни нишонлаётган эди. BangShowBiz маълумотларига кўра, меҳмонлар Леонардонинг ҳайкалчасини қўлдан-қўлга узатиб, «бўрилар тўдаси!» дея ҳайқириб, ресторанни бошига кўтарган.
Тадбирдан сўнг актёр кўчага чиқиб, бир неча киши қуршовида автомобилга йўл олган. Унинг ортидан ҳайкалчани кўтариб олган эркак югуриб келган ва «Оскар»ни кўрсатиб, «Сиз буни олиб кетишни истамайсизми?» дея сўраган.
Эслатиб ўтамиз, актёрнинг мукофот олиши Twitter’да ўзига хос рекорд ўрнатди: унинг номи эълон қилинганидан сўнг фойдаланувчилар бир дақиқа ичида 440 мингдан зиёд твит ёзган.
Изоҳ (0)