Ўзбекистон кинотеатрларида яқин вақт ичида режиссёр Дурдона Тўлаганованинг янги — «9-рақамли бемор» деб номланган фильми намойишлари бошланиши кутилмоқда. Турли гап-сўзларга кўра, фильм руҳий хасталар шифохонасида суратга олинган.
Шу ва фильм билан боғлиқ бошқа маълумотларга ойдинлик киритиш мақсадида, журналист Феруз Муҳаммад режиссёр Дурдона Тўлаганова билан боғланди.
— Ҳиндистонлик киноижодкорлар номи фильмингизникига ўхшаш картина суратга олган. Икки фильм ўртасида қанчалик ўхшашлик бор? Умуман, фильм номи ва ғояси ҳақида қисқача маълумот берсангиз.— «9-рақамли бемор»нинг Болливудда суратга олинган фильмга ҳеч қандай алоқаси ҳам, ўхшашлиги ҳам йўқ. Фильм номига келсак, агар унинг нима учун «9-рақамли бемор» деб номланганини айцам, томошабинга фильмнинг қизиғи қолмайди.
— Фильмда қайси актёр-актрисаларни кўришимиз мумкин?— Фильмда Феруза Норматова, Зуҳра Солиева, Муйяссар Бердиқулова, Анжелика Эсимбетова, Муҳаммадсоли Абдуқундузов каби актёрлар, шунингдек, хонанда Али Отажонов суратга тушган.
— Фильм «Ўзбеккино» Миллий агентлигининг тасдиғидан ўтдими? Премьера қачон?— Фильм «Ўзбеккино» Миллий агентлигининг тасдиғидан ўтди, лекин премьера куни ҳали белгиланганича йўқ.
— Маълумотларга кўра, фильм руҳий хасталар шифохонасида суратга олинган экан?— Йўқ, бу нотўғри маълумот. Фильмда кўрсатилган руҳий хасталар шифохонасини ўзимиз махсус тайёрладик.
Изоҳ (0)