Режиссёр Бурҳон Шаропов «Хато ёхуд фирибгар ошиқ» номли фильм суратга олди. «Бу фильм атиги 15 кунда суратга олинган», деган гап-сўзларнинг қанчалик ҳақиқатга яқинлигини аниқлаш мақсадида журналист Феруз Муҳаммад режиссёр билан мулоқотда бўлди.
— Тўғрисини айцам, съёмка вақтида вақтим бўлмагани сабаб, иккинчи режиссёр интервью бериб юборган экан, — деди Бурҳон Шаропов. — Аслида фильмни 15 кунда эмас, 10 кунда суратга олиб бўлганмиз.
— Ижодий жамоада неча киши бор эди?— Жамоамиз 30 дан ортиқ ижодкор, техниклардан иборат эди. 93 объектли фильмни 10 кун ичида суратга олдик. Тасвирга олиш жараёнида техник ходимлар ва ижодий жамоанинг барча аъзолари яхшигина жонбозлик кўрсатди.
— Суратга олиш ишларида вақт тақсимоти қандай бўлди? — Тасвирга олиш ишлари ҳар кун тонг соат 7:00 да бошланиб, тунги 1:00—2:30 ларгача давом этди.
— 10 кунда суратга олинган фильмнинг сифати, баҳоси қандай бўларкин?— Нимани ўйлаётганингизни тушундим. Суратга олиш ишларига 10 кун сарфланган бўлса-да, актёрларни тайёрлаб, чиғириғимдан ўтказгунча олти ой вақт кетди. Фильм суратга олинадиган объектларни излаш учун ҳам 6—7 ой вақт сарфлаганмиз. Умумий ҳисобда тайёргарлик жараёнининг бошланишидан то монтаж жараёни тугагунига қадар бир йилдан ортиқ вақт сарфладик. Фильмни кўргандан сўнг, унга қанчалик меҳнат сарфланганига ўзингиз гувоҳ бўлишингиз мумкин.
Изоҳ (0)