«Яблоко» партияси Москвада бўлиб ўтган съездида Григорий Явлинский номзодини Россия президентлигига илгари сурди. Унинг сайловларда иштирокини 135 нафар қатнашчи маъқуллади, бир киши қарши чиқди, дея хабар беради Meduza.
Явлинский сайловларда демократик кучларни бирлаштириш учун ҳаракат қилишга ваъда берди, бироқ Михаил Ходорковский билан ҳамкорликдан бош тортди ва бунга «бизнинг сиёсий қарашларимиз турлича» дея изоҳ берди.
Сиёсатчи ўзининг сайловолди дастурида «инсон ор-номуси ва қадр-қимматини ҳимоя қилиш»га урғу беришини маълум қилган. «Ислоҳотлар кўпчилик учун, фуқаролар учун бўлиши лозим, бизнинг вазифамиз шундан иборат», — дея таъкидлаган Явлинский.
Маълумот учун, «Яблоко» партияси асосчиси Григорий Явлинский номзоди 1996 ва 2000 йилларда ҳам президентлик сайловларида илгари сурилган ва уларда тегишли равишда тўртинчи ҳамда учинчи ўринларни эгаллаган.
Изоҳ (0)