Тошкентнинг «Локомотив» футбол клуби мавсумлар оралиғида жамоага келиб қўшилган футболчиларни жамоатчиликка таништириш маросимини ўтказди. Бу ҳақда клуб матбуот хизматига таяниб, Ўзбекистон футбол федерацияси матбуот хизмати хабар берди.
Ўзбекистон профессионал футбол лигасининг ўтган мавсумида кумуш медалларини қўлга киритган тошкентликлар таркибида янги мавсумдан бошлаб Сервер Жепаров, Кахи Махарадзе, Садриддин Абдуллаев ва Шерзод Файзиев ҳаракат қиладиган бўлди.
Икки карра Осиёнинг энг яхши футболчиси деб топилган Ўзбекистон миллий терма жамоаси аъзоси Сервер Жепаров тадбир давомида Жанубий Кореянинг «Ульсан Хюндай» клуби билан шартномаси тугагач, «темирйўлчилар» таклифини қабул қилганини айтиб ўтди. Таъкидлаш керакки, «Локомотив» 33 ёшли тажрибали футболчи учун профессионал футболчилик фаолиятидаги саккизинчи клуб бўлади. Бунга қадар Жепаров «Навбаҳор», «Пахтакор», «Бунёдкор», «Сеул» (Жанубий Корея), «Аш-Шабоб» (Саудия Арабистони), «Сеонгнам» (Жанубий Корея) ҳамда «Ульсан» (Жанубий Корея) жамоаларида фаолият олиб боришга улгурган.
Ўзбекистон миллий терма жамоаси сафида 113 ўйинда майдонга тушиб, 25 голга муаллифлик қилган Сервер Жепаров «Локомотив» таркибида 8-рақамда тўп тепадиган бўлди. Жамоа сафига келиб қўшилган бошқа футболчилар – Файзиевга 37, Абдуллаевга 7 ва Махарадзега 5-рақамли футболкалар тақдим этилди.
Шуни қўшимча қилиш керакки, «Локомотив» мавсумдаги илк расмий ўйинини Осиё Чемпионлар Лигаси—2016 гуруҳ босқичи доирасида Саудия Арабистонининг «Ал-Иттиҳод» жамоасига қарши ўтказади. Ушбу ўйин 23 февраль, сешанба куни, «Локомотив» стадионида, соат 15:00 да бошланади.
Изоҳ (0)