Футзал бўйича Тошкентда ўтказилаётган Осиё чемпионатининг финал ўйини якунига етди. Унда Ўзбекистон ва Эрон терма жамоалари майдонга тушишди.
Учрашувнинг 6-дақиқасида эронлик футзалчиларнинг хатосидан Дилшод Ирсалиев унумли фойдаланиб, Ўзбекистонни олдинга олиб чиққанди. Аммо 9-дақиқада Қудрат Баҳодорий узоқ масофадан Рустам Умаров дарвозасини ишғол қилди. 14-дақиқада бурчак тўпини тезкорлик билан амалга оширган эронликлар Муҳаммад Кешаварзнинг зарбасидан кейин ҳисобда олдинга чиқиб олди. Шу вазиятда Ўзбекистон термасининг асосий посбони Рустам Умаров жароҳат олиб, ўйинни давом эттира олмади. Унинг ўрнига майдонга тушган Клим Тюгаев ўз ўрнида ишончли ҳаракат қилиб, рақибнинг бир неча зарбасини қайтарди.
1:2 ҳисобини Ўзбекистон ўйин охиригача ўзгартиришга ҳаракат қилди, бироқ Хосе Мария Мендез шогирдларининг барча уринишлари бесамар кетди.
Эрон Тошкентда ўтказилган Осиё чемпионатида ғалаба қозониб, ўз тарихида 11-маротаба Осиёда тенгсизга айланди. Тўртинчи марта финалда иштирок этган Ўзбекистон футзал термаси эса яна кумуш медаллар билан чекланди.
Футзал. ОЧ—2016. Финал
Ўзбекистон — Эрон 1:2 (1:2)
Голлар: Дилшод Ирсалиев (6) – Қудрат Баҳодорий (9), Муҳаммад Кешаварз (14).Ўзбекистон: 1. Рустам Умаров, 7. Дилшод Раҳматов, 8. Фарҳод Абдумавлонов, 11. Артур Юнусов, 14. Константин Свиридов.
Захира: 2. Дилшод Ирсалиев, 3. Нодир Элибоев, 4. Феруз Фахриддинов, 5. Даврон Чориев, 6. Жавлон Аноров, 9. Андрей Шлема, 10. Жамолиддин Шарипов, 12. Акмалжон Хазратқулов, 13. Клим Тюгаев.
Эрон: 1. Сепер Муҳаммадий, 5. Ҳамид Аҳмадий, 7. Асқар Ҳасанзода, 9. Ризо Сансефидий, 12. Ҳуссайн Тойибий.
Захира: 2. Алирози Самимий, 3. Жавад Исфандарий, 4. Муҳаммад Кешаварз, 6. Алиризо Вафоий, 8. Қудрат Баҳодорий, 10. Муҳаммад Тоҳирий, 11. Меҳран Алиқодир, 13. Фарҳод Тавакколий, 14. Маҳди Жавид.
Изоҳ (0)