Хосе Мария Мендез: 20 йиллик фаолиятим давомида бундай мухлисликни кўрмаганман

Футзал бўйича Осиё чемпионати финалида Ўзбекистон ва Эрон терма жамоалари ўртасида кечган баҳсдан сўнг Ўзбекистон терма жамоаси бош мураббийи Хосе Мария Мендез матбуот анжуманида иштирок этди, деб ёзади «Uff.uz».

- Биз Эрондек кучли жамоага қарши ҳам ўйнай олиш мумкинлигини исботлаб бердик. Бу эса ҳал қилувчи аҳамиятга эга. Биз бу мусобақада эришган натижамизга ҳозир тушуна олмаётган бўлишимиз мумкин, чунки ҳиссиётлар жўш урмоқда. Аммо эртага нималар қила олганимиз ва нималарни амалга ошира олмаганимизни тушуниб етишимиз мумкин. Мен йигитларга раҳмат айтаман. Биз мусобақа давомида кучли рақибларга қарши ўйнадик. Эрон эса анча осон жамоалар билан куч синашди. Балки шу сабабга кўра, бугун жисмоний ҳолатимиз у қадар ўзимиз кутгандек бўлмаган бўлиши мумкин. Бугунги ўйиндаги шиддатга мухлисларнинг ҳиссаси катта. 20 йиллик мураббийлик фаолиятимда бундай мухлисликни кўрмаганман.

- Жамоангиз ўйин бошида у қадар кучли ўйин намойиш этмади ва бора-бора кучайиб борди. Бу аввалдан ўйланганмиди?- Эрон терма жамоаси илк дақиқаларда ўз ўйинини намойиш эта олмаса, кейин шашти пасайиб қолишини билган эдик. Рақиб аввалги ўйинларда тезкор гол уриб олгач, кетма-кет дарвозани ишғол этишга тушиб кетарди. Аксинча, ўз ўйинини топа олмаса, муаммоларга дуч келишини билардик. Эрон сўнгги дақиқаларга қадар дурангдан қўрқиб ўйнади.

- Таиланд терма жамоаси бош мураббийи ҳакамлар тайинланиши ва мусобақа тақвимидан норозилик билдирди. Бу борада фикрингизни билмоқчи эдик.- Очиғи, ҳакамлар қандай тайинланишини билмайман. Шунингдек, тақвим борасида ҳам ҳеч қандай маълумотга эга эмасман. Мен фақат ўйинга бораман ва рақибга қарши кураш олиб бораман. Шундай бўлса-да, ўз фикримни билдираман. 2012 йилги Осиё чемпионатига қараганда бу сафарги мусобақада йўлланмаларни тақсимлаш анча адолатли тарзда ўтказилди. Ўтган сафарги қитъа биринчилигида бешинчи йўлланма учун алоҳида ўйинлар ўтказилмасдан, тўплар нисбатига асосланиб, ЖЧ иштирокчиси аниқланган эди.

Эслатиб ўтамиз, Тошкентда ўтказилган футзал бўйича Осиё чемпионати финалида Эрон 2:1 ҳисобида Ўзбекистондан устун келди.