19 февраль куни Ўзбекистон Олий Мажлиси Сенати ва Қонунчилик палатасининг қўшма мажлисида прокуратура органлари устидан парламент назорати самарадорлигини ошириш масаласи кўриб чиқилди. Бу ҳақда «Ўзбекистон» ахборот агентлигига таянган ҳолда «Газета.uz» сайти хабар берди.
Йиғилиш якунларига кўра палаталар кенгашлари Сенат қошида прокуратура органлари фаолиятини назорат қилиш бўйича комиссия ташкил этиш тўғрисида қўшма қарор қабул қилди. Бундан кўзланган мақсад – прокуратура органлари фаолияти устидан парламент назоратини амалга оширишнинг ташкилий-ҳуқуқий жиҳатларини янада такомиллаштириш, мамлакатда қонун устуворлигини таъминлаш борасидаги ишлар самарадорлигини ўстириш, фуқаролар ҳуқуқ ва эркинликлари, жамият ва давлат манфаатларини ишончли ҳимоя қилиш.
Комиссия зиммасига прокуратура фаолияти, прокуратура органлари томонидан ўз вазифаларининг бажарилиши устидан самарадор назорат олиб бориш юкланади.
Комиссия аъзолари Сенат тарафидан кўрсатилган ваколат муддатига сайланади. Комиссия таркибига мамлакатнинг ҳар бир минтақасидан биттадан вакил, жами 15 киши кириб, улар бир йилда икки марта Сенат Кенгаши олдида ҳисобот топширади.
Изоҳ (0)