Тошкентда қулоқчин таққан қиз сабаб чорраҳада ҳаракатланиб келаётган Damas автомобили ағдарилиб кетди. Шаҳар чорраҳаларига ўрнатилган кузатув камераларидан бирига ёзиб олинган ва ЎзМТРК томонидан намойиш этилган йўл-транспорт ҳодисасидан парча Facebook’даги «Водители Ташкента» гуруҳида улашилди.
Ҳодиса қачон, қайси чорраҳасида юз берганига аниқлик киритилмаган. Қулоқчин (наушник) таққан қиз, ҳодиса юз берган вақтда пиёдалар учун ҳаракат тақиқланганига қарамай, йўлни кесиб ўтишни бошлаган.
Светофорнинг яшил чироғига чорраҳага кириб келган Damas ҳайдовчиси тезликни камайтиришга улгурмаган ва қизни уриб юбормаслик учун рулни чап томонга бурган. Кескин манёвр оқибатида Damas йўл ўртасидаги светофор устунига урилган ва ағдарилиб кетган, устун қийшайиб, светофор ишдан чиққан.
Ўзидан 2—3 метр узоқликда автомобиль ағдарилиб кетганидан сўнг, қоидага ҳилоф равишда йўлни кесиб ўтаётган қиз қулоқчинни ечиб, бироз тўхтаб турган, сўнг яна ўз йўлида давом этган. Видеоёзувда қарама-қарши томондан келган Spark автомобили ҳайдовчиси ва йўловчиси ағдарилган Damas томон ёрдамга ошиққанини кўриш мумкин.
Мазкур видеоёзув «Водители Ташкента» гуруҳида фаол баҳс-мунозарага сабаб бўлди. Фойдаланувчиларнинг аксарияти, биринчидан, қоидага ҳилоф равишда (ҳаракат фақат автомобиллар учун рухсат берилган вақтда) йўлни кесиб ўтаётгани, иккинчидан, йўлни кесиб ўтиш вақтида қулоқчин тақиб, нафақат ўз ҳаётини, балки ҳаракатнинг бошқа иштирокчиларини ҳам хавф остида қолдирган қизни кескин танқид қилган. Бир гуруҳ фойдаланувчилар Damas автомобили чорраҳага шиддат билан кириб келганини ҳам қоралаган.
Эслатиб ўтамиз, Ўзбекистонда 1 мартдан эътиборан Йўл ҳаракати қоидаларининг янги таҳрири кучга киради. Унга кўра (Қоидаларнинг 19-моддаси бўйича), йўлнинг қатнов қисмида, шунингдек пиёдалар ўтиш жойларида ҳаракатланаётган пиёдаларга телефондан фойдаланиш, теле-, видеомаҳсулотларни кўриш, радио-аудиомаҳсулотларни эшитиш, китоб ёки даврий матбуот ўқиш, ҳамда эътиборни чалғитадиган бошқа электрон воситалардан фойдаланиш тақиқланади.
Изоҳ (0)