Senatda prokuratura organlari nazorati bo‘yicha komissiya tashkil etildi
19-fevral kuni O‘zbekiston Oliy Majlisi Senati va Qonunchilik palatasining qo‘shma majlisida prokuratura organlari ustidan parlament nazorati samaradorligini oshirish masalasi ko‘rib chiqildi. Bu haqda “O‘zbekiston” axborot agentligiga tayangan holda “Gazeta.uz” sayti xabar berdi.
Yig‘ilish yakunlariga ko‘ra palatalar kengashlari Senat qoshida prokuratura organlari faoliyatini nazorat qilish bo‘yicha komissiya tashkil etish to‘g‘risida qo‘shma qaror qabul qildi. Bundan ko‘zlangan maqsad – prokuratura organlari faoliyati ustidan parlament nazoratini amalga oshirishning tashkiliy-huquqiy jihatlarini yanada takomillashtirish, mamlakatda qonun ustuvorligini ta’minlash borasidagi ishlar samaradorligini o‘stirish, fuqarolar huquq va erkinliklari, jamiyat va davlat manfaatlarini ishonchli himoya qilish.
Komissiya zimmasiga prokuratura faoliyati, prokuratura organlari tomonidan o‘z vazifalarining bajarilishi ustidan samarador nazorat olib borish yuklanadi.
Komissiya a’zolari Senat tarafidan ko‘rsatilgan vakolat muddatiga saylanadi. Komissiya tarkibiga mamlakatning har bir mintaqasidan bittadan vakil, jami 15 kishi kirib, ular bir yilda ikki marta Senat Kengashi oldida hisobot topshiradi.
