Россия маъмурий-ҳудудий субъектларининг раҳбарлари амалдорлар саводхонлиги рейтингида охирги ўринни эгаллади. Тадқиқот натижаларини эълон қилган «Российская газета» нашрининг маълум қилишича, рейтинг А. С. Пушкин номидаги Давлат рус тили институти ҳамда Алоқа ва оммавий коммуникациялар вазирлиги томонидан ҳамкорликда тузилган. Бу ҳақда «РБК» хабар бермоқда.
Минтақалар раҳбарларининг саводхонлик коэффициенти 10 баллдан 2,3 га тенг деб топилиб, улар рейтингда 4-ўринга қўйилди. Биринчи поғонани 9,4 баллик кўрсаткич билан федерал вазирлар банд қилган бўлса, улардан сўнг Давлат Думаси депутатлари (6,4 балл) ва маҳаллий бошқарув органлари вакиллари (6,3 балл) жойлашди.
Коэффициентни ҳисоблаб чиқаришда муайян вақт бирлигида амалдорлар нутқида нечта хато кузатилишига эътибор қаратилди. Агарда ўн дақиқалик нутқ давомида битта хатога йўл қўйилса, унда амалдорнинг коэффициенти ўнга, бешта хато кузатилган тақдирда – иккига тенг бўлади.
Таҳлил объекти сифатида радио ва телевидениедаги чиқишлар олинди. Умумий хулосага кўра, амалдорларнинг нутқи «саводли ва рус адабий тили меъёрларининг бузилиш ҳоллари кам кузатилади». Бундан ташқари, нотиқлар аксар ҳолатларда бой луғатга эга бўлиб, иборалар ва прецедентли матнлардан ўринли фойдаланилиши аниқланди.
«Сиёсатчиларнинг нутқи, умуман олганда, мантиқийлик ва далилланганлик билан тавсифланади», – дейилади тадқиқотда.
Изоҳ (0)